ವೇದ ಪಠಣ ಕ್ರಮ.. ಲೇಖನ: ಶ್ರೀ ಶ್ರೀವತ್ಸ ಜೋಶಿ
ದಂಡಕ್ರಮ ಪಾರಾಯಣದಲ್ಲಿ ಬಣ್ಣದ ತಗಡಿನ ತುತ್ತೂರಿ... [ತಿಳಿರುತೋರಣ * 07Dec2025 * ಶ್ರೀವತ್ಸ ಜೋಶಿ] ಅದ್ಭುತವೂ ಅಸದೃಶವೂ ಆದ ವಿದ್ಯಮಾನವೊಂದು ಕಳೆದವಾರ ಕಾಶಿಯಲ್ಲಿ ಜರುಗಿದ ಸಮಾಚಾರವನ್ನು ನೀವು ಓದಿ/ಕೇಳಿಯೇ ಇರುತ್ತೀರಿ. ಅದೇ- ಮಹಾರಾಷ್ಟ್ರ ಮೂಲದ ದೇವವ್ರತ ಮಹೇಶ ರೇಖೆ ಎಂಬ 19 ವರ್ಷ ವಯಸ್ಸಿನ ನವತರುಣ ವೇದಮೂರ್ತಿಯ ದಂಡಕ್ರಮ ಪಾರಾಯಣ. ಪುಸ್ತಕದ ಸಹಾಯವಿಲ್ಲದೆ, ಕೇವಲ ಸ್ಮರಣಶಕ್ತಿಯಿಂದ ಶುಕ್ಲ ಯಜುರ್ವೇದದ ಮಾಧ್ಯಂದಿನೀಯ ಶಾಖೆಯ 2000 ಮಂತ್ರಗಳ ದಂಡಕ್ರಮ ಪಾರಾಯಣವನ್ನು ಕಾಶಿಯ ವಲ್ಲಭರಾಮ ಶಾಲಿಗ್ರಾಮ ಸಾಂಗವೇದ ವಿದ್ಯಾಲಯದಲ್ಲಿ ಅಕ್ಟೋಬರ್ 2ರಿಂದ ನವೆಂಬರ್ 30ರವರೆಗೆ ವಿದ್ವತ್ವರ್ಗದ ಸಮ್ಮುಖದಲ್ಲಿ ಮಾಡಿದ್ದು, 200 ವರ್ಷಗಳ ಬಳಿಕ ವಿದ್ವಾಂಸರೊಬ್ಬರು ಮಾಡಿರುವ ಸಾಧನೆ ಇದಾಗಿರುವುದು, ಪ್ರಧಾನಿ ಮೋದಿಯವರಿಂದಲೂ ಸೇರಿದಂತೆ ದೇಶಾದ್ಯಂತ ಮೆಚ್ಚುಗೆ ವ್ಯಕ್ತವಾಗಿರುವುದು, ಶೃಂಗೇರಿ ಶ್ರೀಗಳಿಂದ ಸುವರ್ಣಕಂಕಣ ಸನ್ಮಾನ ಸಂದಿರುವುದು, ಮಾಧ್ಯಮಗಳು ದೇವವ್ರತ ರೇಖೆ ಮತ್ತು ಅವರ ತಂದೆಯ ಸಂದರ್ಶನಗಳನ್ನು ಪ್ರಸಾರ ಮಾಡಿರುವುದು... ಇತ್ಯಾದಿ. ಈ ಹಿನ್ನೆಲೆಯಲ್ಲಿ, ಸುಮಾರು 20 ವರ್ಷಗಳ ಹಿಂದೆ ನಾನು ಬರೆದಿದ್ದ ‘ವೇದಪಠನ ವಿಧಾನಗಳ ವಿಸ್ಮಯ’ ಎಂಬೊಂದು ಲೇಖನದ ಸಾರಾಂಶವನ್ನು ಮೊದಲು ನಿಮ್ಮ ಓದಿಗೆ ಒದಗಿಸುತ್ತೇನೆ. ಆಮೇಲೆ ನಿರ್ದಿಷ್ಟವಾಗಿ ದಂಡಕ್ರಮ ಪಾರಾಯಣದ ಬಗ್ಗೆಯೇ ಮತ್ತೊಂದಿಷ್ಟು ಸೋದಾಹರಣ ವಿವರಗಳನ್ನು ನೋಡೋಣವಂತೆ. ಹದಿಮ...